今日天氣非常之咁好，好似一日好過一日咁，真係想唱番首《明天會更好》。見咁好日我就按地圖所講，睇下有邊度近近哋酒店又唔算太近，可以一路行去一路睇風景，又感受下民風。行下行下，一個轉身就去到大阪秋葉原之稱，集合電器、電玩、動漫、模型扭蛋、光碟等等，實為御宅族天堂。
浪速區日本橋 - 大阪秋葉原
呢一帶俗稱Den Den Town電電城(でんでんタウン)，同秋葉原一樣都係主要賣動漫產品，仲有好多歷代遊戲機嘅出品，想買返絕版嘢呢度就啱哂。一大早去唔知點解已經開哂，是日本人的習慣，定係真係咁早有生意？街上面有成十零廿間左右嘅鋪頭，都係賣玩具figures模型，仲有少量係賣萌賣成人嘢。我高估咗自己對新奇事物的接受能力，或者真係早得濟，個人都呆呆哋。結果只係行哂玩具模型，無入去萌/色店。
黑門市場
望地圖就好似好近，但實則就行咗幾個街口先嚟到目的地—關西廚房黑門市場。有得呢個稱呼，全因佢有齊多樣化食材，林林種種嘅醬菜漬、新鮮即切即劏即食的魚肉類、仲有師傅識處理先有得食嘅雞泡魚。見到咁多嘢食真係好吸引，但係一個人又食得啲咩呢……所以由街頭行到街尾，街尾又行返去街頭，見證着好多一雙雙情侶、三五成群嘅朋友喺度分享嘢食，我就得個睇字算了。
神戶牛、白粉紅士多啤梨、拖羅，如果有人同我分…就會試！下次一定夾人嚟。
はり重(カレーショップ) - 和牛版吉野家
行完咁出名嘅黑門市場，已經成口都係口水，個肚仲打哂鼓添。結果，兜兜轉轉都係去返道頓堀搵嘢食，係京都食完超出名嘅壽喜燒，好食牛肉的我，係大阪又點少得試吓呢間咁出名嘅平民和牛啊。創於1919年，又係一間接近百年之老店，餐廳保留昭和年代風格，非常有復古味道。
餐廳陳設有啲似日式西餐廳，但係有和風感覺，加埋有返咁上下年紀嘅叔叔嬸嬸做侍應，就有種講唔出嘅親切感。佢哋唔係親戚，但應該合作左好多年，展露出嚟嘅默契比家人過之而無不及，做食客都會好溫暖。
我叫左份算幾地道嘅特別版牛肉飯，無叫到煎牛扒，咁先係日本餐呀嘛！份壽喜燒丼定食一上到台，個感覺已經出晒黎，托盤碗筷擺錢都有幾分似吉野家（咁係你叫牛肉飯吖嘛），雖然相貌好似但係內裏性格一啲都唔同。
細心啲睇你會發覺佢嘅伴碟佢嘅面試湯佢嘅飯粒佢嘅牛肉，絕對絕對唔會係平個種，但係肉質反映晒一切，貴少少自然有佢嘅原因，唔會係黑店咁呃你入去咩！牛肉係大大塊嘅，比起吉野家嗰啲薄薄片餐排完有一定厚度。牛味仲非常之出眾，唔會好多肥膏，但係都油脂感充足嘅感覺，肉汁仲流晒落啲飯度，唔使加牛汁已經好得，兩三下搞到你爬哂啖飯，個碗麵豉湯有少少畫龍點睛嘅感覺。再講，咁平食到和牛，仲想點喎，埋張單只不過同我哋平時晏晝食飯差唔多價位，爽皮。
係香港茶記食晏雖可愛兼地道，但好多時被考驗EQ，對比呢樹，同價錢又多謝前前後後，服務周到，不需比。
大阪城 - 天守閣
食飽飽就繼續觀光，為咗今日周圍去開心啲抵啲，我仲買咗大阪周圍觀光嘅一日pass，抵就抵在包晒當日所有觀光重點嘅入場劵。嚟到大阪就點可以少得去大阪天守閣呢？大阪天守閣除咗係一級歷史文物之外，裏面仲有好多關於大阪歷史嘅常設展覽可以睇，解釋咗好多日本出名家族嘅歷史。包括織田信長，唔知邊個同唔知邊個。仲有一個天守閣，周圍無咩高建築物，能夠一覽大阪全市面貌，人望高處呢句就真嘅，係高處望到景觀都輕鬆啲。
大阪歷史博物館、NHK電視台
睇完天守閣，梗係要去埋隔離嘅大阪歷史博物館同埋電視台啊，頭先天守閣睇咗舊嘅歷史，博物館睇嘅就係近代史。雖然人影都唔多見隻，但係就有種樂得自在嘅感覺，隔離嘅HK仲有個位係直播嘅播映廠俾你偷睇到，會見到佢哋搭佈景時候嘅認真同埋牽涉嘅人力多到你唔信。
動物園町
睇完兩個遊客必到景點之後，就衝埋去動物園站嘅通天閣啦。一到通天閣已經見到好多隻佢嘅吉祥物周圍擺，仲經過Jan Jan橫丁(ジャンジャン橫丁)有好多將棋嘅鋪頭添，望到啲伯伯公公係棋會勁享受邊茶邊下。
新世界元祖串炸 - 串かつ「くしかつ」だるま
通天閣附近有好多出名嘅串炸鋪，嚟梗係揀間有名氣啲嘅海外僱傭中心，啊唔係，鬍鬚佬串炸啦。呢間於1929年開業嘅人氣熱店淨係排隊都排左15分鐘，鋪頭入邊嘅人仲係坐到密密麻麻，我講緊嘅係平日而且個鐘數都唔係好晏咋啵，大概五六點到，佢嘅威力真唔細。
坐低係吧枱之後，見到好多日本人勁盡情咁叫串炸嚟食，好似唔駛錢咁。我都唔執輸，就拎起份侍應俾我嘅英文餐單，咩嘢想試就篤篤下，順手再叫埋一杯凍冰冰嘅生啤配，咁先係正架嘛。食下又一串，食下又幾串，原來自己都可以有酒餸嘅時候食咁多，呢樣食品嘅威力真係無窮啊，點解咁熱氣啲日本人都唔係好多暗瘡嘅呢。好體貼的店員係同我講完一大堆日文知道我唔識聽之後就俾咗英文餐牌我，樣樣都想試…
我食嘅包括蝦、薑蓉雞串、原祖牛肉串炸、牛舌、雞皮、蠔、雞軟骨、芝士獅子狗(竹輪)、茄子、年糕。足足試哂咁多特式嘢咁濟，發覺牛肉拎嚟炸始終都係無咁好食，強烈推介蠔、芝士竹輪、年糕！呢三樣勁配用嚟炸，蠔炸出奇香，而且係期間限定；年糕呢類簡單食材，係考炸功同醬汁味道；芝士竹輪就對我呢位芝士控嚟講係無得避，而且是呢個店的特別食材。
上碟個陣有點搞笑，就算職員介紹番，最後我都係認唔出，因為支支都差唔多樣，有點出奇蛋感覺，咬落先知。食個陣最正係個汁，但緊記要守規矩，一根一次不能點兩次，保持衛生。其實一下掛上的汁也足夠調味了；再加上無限refill的生椰菜，清甜加酸甜，令人不知不覺地吃更多了。就算有調味粉，也不需要了，十分夠味。
食完野之後，梗係搵地方行返夠本gur番啖氣啦。大阪另一出名嘅景點，就係當年出晒名嘅通天閣佢好唔執輸，入去睇返夠本先，仲有Pocky嘅專門店係底層，任得人買手信。鍾意百力滋嘅朋友應該會不停手買買買。
道頓堀 - 遊夜船
上到通天閣望到大阪市嘅全夜景，又返道頓堀行返幾個圈，就先用埋個日日見去睇下道頓堀條運河。衝咗上架得日文介紹嘅觀光船，個姐姐淨係識講日文，但識搞氣氛，就算唔明佢講咩睇佢表情都略知一二。好就好在平時係橋上面只望到個馬拉松男人嘅一面，原來坐咗係船望住條運河真係有另一番滋味。仲俾我知道原來我有啲似日本人，前後座位嘅香港人喺度講我以為我唔知，傻的嗎。
北極 - 忌廉芝士回轉燒
游完船河就衝咗去搵北極！因為係最後一晚留係大阪，我多日行經已經好想試，見到回轉燒燒燒下，啲香氣簡直係好似動漫咁有縷煙飄出嚟，但次次都飽得濟。今晚時間都唔夠，衝到去佢已經收爐…正當失落咗兩秒間，員工好貼心咁問我係咪想食然後問我要咩口味。我即刻blingbling眼，梗係揀最愛嘅芝士！店員即於暖櫃中取出包好的燒餅，又香又滑，簡直比什麼什麼芝士撻更好。
北極最好笑的地方係佢出名賣冰棒，但冬天時會賣燒餅，吉祥物仲要係北極無嘅企鵝。
食完甜品先食正餐，去到日本點可以唔識扮嘢，都覺得嗰度都有好多出名嘅拉麵鋪，梗係揀啲係香港無得食嫁啦，唔係嚟日本真係試吓佢同香港嗰間有咩分別咩。我揀咗來四天王到時佢最出名嘅四天王拉麵。四天個解釋係四種伴隨拉麵嘅天王，呢四種配合得好，就真正可以做到一等一嘅拉麵，分別係湯、麵、醬油同叉燒。
而且最正嘅係四天王拉麵，係即叫即炒！炒？無睇錯，係炒香啲芽菜、椰菜、豚肉、洋蔥，呢幾樣料頭。開頭我都唔信呢幾樣嘢有幾配拉麵啊…結果係位度見到師傅係鑊上用足火炒起，再加上蠔油辣醬，炒到慶慶humhum，香氣四溢，再由師傅雙手奉上一碗熱騰騰嘅拉麵。
鹽味拉麵於前，聞到陣陣炒香的料頭，再加上大量蔥，無得頂。呢碗拉麵也算是我全個旅程吃過最好的拉麵，一來我重口味，二來真係好香，三來樣樣嘢都好夾，無爭先恐後，順住咁入喉帶香(但我係無食到叉燒，遺憾)。鹽味無搶到醬油的提鮮，醬油又無蓋過鹽味的清咸香，兩下就食哂，仲清埋啲湯…
買咗張卡都抵哂，去咗咁多遊客景點，仲吃咗咁多嘢，唔肥都難。行番去個陣見到能唱男女二聲的女生，還有畫Q版人像的畫家，真高興日本能多向產藝術文化。
今日最印象深刻係於大阪城前那空地，看見那時空膠囊，還有遍地鴿子的場景，周邊有學生參觀，旅行團到來，情侶自拍，老人家餵食，家庭和睦，好像只有自己拿起相機那刻是靜止。我孤身以第三身角度到此一遊。
為什麼要怕妳飛走，才立於地上？要怕，才踏實嗎？遠去的距離是離地的，還是於水平線上的？片刻，鴿被我嚇飛了，彷彿是親手裁種的愛情，確定的計劃偏了，也放了。
太濫情，受不了。當下決定，就把這些放進了膠囊，不帶走。
はり重(カレーショップ)
大阪市中央区道頓堀1-9-17 06-6213-4736
www.harijyu.co.jp
串かつ「くしかつ」だるま
大阪市浪速区恵美須東1-6-8 06-6643-1373
www.kushikatu-daruma.com
北極
大阪府大阪市中央区難波3-8-22 06-6641-3731
www.hokkyoku.jp
四天王拉麵
大阪市中央区道頓堀1-7-25 タカコ第五ビル 06-6212-6350
Ed
呢啲嘢啊? (edyeah.blogspot.hk)
